Monday, December 27, 2010

ភ្នាក់​ងារ​បម្រើ​ការ​ឲ្យ​ក្រុម​ហ៊ុន​ជ្រើស​បុគ្គលិក​តម្រូវ​ឲ្យ​ពាក់​ឯក​សណ្ឋាន បញ្ចៀស​ការ​បន្លំ

ប៊ុត រស្មីគង្គា

ភ្នុំពេញៈ មន្រ្តី​បាន​ឲ្យ​ដឹង​កាល​ពី​ថ្ងៃ​ម្សិល​មិញ​ថា ភ្នាក់​ងារ​ដែល​ធ្វើ​ការ​ងារ​ឲ្យ​ក្រុម​ហ៊ុន​ជ្រើស​រើស​ពល​ករ​ដែល​ មាន​អាជ្ញា​ប័ណ្ណ​នឹង​តម្រូវ​ឲ្យ​ពាក់​ឯក​សណ្ឋាន និង​កាន់​ប័ណ្ណ​សម្គាល់​ខ្លួន​ ចាប់​ពី​ខែ​មករា​ឆ្នាំ​ក្រោយ​តទៅ នៅ​ក្នុង​កិច្ច​ខិត​ខំ​ប្រឹង​ប្រែង​ដើម្បី​ញែក​ពួក​គេ​ឲ្យ​ដាច់​ចេញ​ពី​ ឈ្មួញ​កណ្តាល​។

លោក អាន ប៊ុនហាក់ ​ប្រធាន​សមាគម​ទីភ្នាក់​ងារ​ជ្រើស​រើស​ពល​ករ​កម្ពុជា​បាន​ថ្លែង​ឲ្យ​ដឹង​ថា វា​ជា​គំនិត​ផ្តួច​ផ្តើម​រួម​គ្នា​របស់​ក្រសួង​ការ​ងារ ក្រសួង​មហា​ផ្ទៃ និង​សមាគម​ទីភ្នាក់​ងារ​ជ្រើស​រើស​ពលករ​កម្ពុជា​នោះ ដែល​បាន​ផ្តួច​ផ្តើម​ឡើង​ដើម្បី​ឆ្លើយ​តប​ទៅ​នឹង​ការ​កើន​ ឡើង​នូវ​ករណី​ជា​ច្រើន ទាក់​ទង​នឹង ពល​ករ​ចំណាក​ស្រុក ដែល​គេ​ជួញ​ដូរ ឬ​រំលោភ​បំពាន។

លោក អាន ប៊ុនហាក់ បាន​ឲ្យ​ដឹង​ថា៖ «​យើង​បាន​សិក្សា​អំពី​មូល​ហេតុ​ដែល​តែង​មាន​បញ្ហា​ជា មួយ​នឹង​ពល​ករ ​បាន​រក​ឃើញ​ថា ​៩០​ភាគ​រយ​នៃ​បញ្ហា​ បណ្តាល​មក​ពី​ការ​ជ្រើស​រើស​»។ លោក​ថា ​ឈ្នួញ​កណ្តាល​ដែល​គ្មាន​អាជ្ញា​ប័ណ្ណ​ តែង​ផ្តល់​ព័ត៌​មាន​មិន​ពិត​ឲ្យ​ពល​ករ។ លោក​ថា​៖ ​«​ឧទាហរណ៍ អ្នក​បោក​​ប្រាស់​ថា ​ពលករ​អាច​បាន​ប្រាក់​ខែ​ច្រើន​និង​ការ​ងារ​ស្រួល ប៉ុន្តែ​អ្វី​ដែល​ពួក​គេ​ជួប​ប្រទះ​នៅ​បរទេស​ គឺ​ខុស​ពី​អ្វី​ដែល​ពួក​គេ​ដឹង​មុន​ទៅ​បម្រើ​ការ​ងារ​»​។

លោក​បាន​បន្ថែម​ទៀត​ថា ពាក្យ ទីភ្នាក់​ងារ​ជ្រើស​រើស​ពល​ករ​ស្រប​ ច្បាប់​ នឹង​បោះ​ពុម្ព​លើ​ផ្នែក​ខាង​ក្រោយ​អាវ​យឺត ដែល​មាន​ឈ្មោះ​ និង​អាសយ​ដ្ឋាន​អ៊ិនធឺណិត​ក្រុម​ហ៊ុន​ដែល​ភ្នាក់​ងារ​បម្រើ​ការ​។ ​ប័ណ្ណ សម្គាល់​អត្ត​សញ្ញាណ​នឹង​បង្ហាញ​ឈ្មោះ​របស់​ភ្នាក់​ងារ ​ក្រុម​ហ៊ុន លេខ​ប័ណ្ណ​ និង​ថ្ងៃ​ផុត​កំណត់​។

លោក អាន ប៊ុនហាក់ បាន​បន្ត​ថា​កិច្ច​សហ​ប្រតិបតិ្ត​ការ​ជា​មួយ​នឹង​ក្រសួង​ការ​ងារ ដើម្បី​គ្រប់​គ្រង​និង​​ទទួល​ខុស​ត្រូវ​លើ​ពលករ​ដែល​ទៅ​ធ្វើ​ការ​នៅ​ក្រៅ​ ប្រទេស​ ហើយ​នគរ​បាល​និង​អាជ្ញា​ធរ​តាម​មើល​ក្រុម​ហ៊ុន​ដើម្បី​ឲ្យ​ដឹង​ថា តើ​ក្រុម​ហ៊ុន​ណា​កំពុង​ជ្រើស​រើស​ពល​ករ​ខុស​ច្បាប់ និង​ស្រប​ច្បាប់​។

លោក ហ៊ូ វុទ្ធី ​អគ្គ​នាយក​រង​នៃ​ក្រសួង​ការ​ងារ​ បាន​ឲ្យ​ដឹង​ថា ឯក​សណ្ឋាន​នឹង​ផ្តល់​ឲ្យ​តែ​ភ្នាក់​ងារ​ដែល​ធ្វើ​ការ​ឲ្យ​ក្រុម​ហ៊ុន​ទទួល​ បាន​ការ​អនុញ្ញាត​ពី​ក្រសួង​។

លោក​បញ្ជាក់​ថា៖ «​ខ្ញុំ​គិត​ថាឯក ​សណ្ឋាន​នេះ​សំខាន់ ព្រោះ​វា​ជួយ​ ឲ្យ​ងាយ​ស្រួល​ស្គាល់​ភ្នាក់​ងារ ឬ​ បុគ្គលិក​របស់​ក្រុម​ហ៊ុន​ជ្រើស​រើស​ពល​ករ​ឯក​ជន​នៅ​ពេល​ពួក​គេ​ ចុះ​ធ្វើ​ការ​តាម​ទី​ក្រុង​ឬ​ខេត្ត»។

លោក​គិត​ថា វាជា​គំនិត​ផ្តួច​ផ្តើម​មួយ​ដែល​នឹង​ជួយ​លុប​បំបាត់​បញ្ហា​ដែល​បណ្តាល​មក​ពី​ឈ្មួញ​កណ្តាល​​គ្មាន​អាជ្ញា​ប័ណ្ណ។

លោក​ថ្លែង​ថា៖ «​រហូត​មក​ដល់​ពេល​នេះ មាន​តែ​ក្រសួង​ការ​ងារ​តែ​មួយ​ប៉ុណ្ណោះ ដែល​មាន​ភារ​កិច្ច​ជ្រើស​រើស​ពល​ករ​កម្ពុជា​ឲ្យ​ទៅ​ធ្វើ​ការ​នៅ​កូរ៉េ​ខាង​ ត្បូង ​ហើយ​ក្រសួង​ធ្វើ​ការ​ងារ​នេះ​ពី​ឆ្នាំ ២០០៦»។

អ្នក​ស្រី លីម មុនី អនុ​ប្រធាន​កម្ម​វិធី​សិទិ្ធ​កុមារ​និង​ស្រ្តី របស់​អង្គ​ការ​សិទិ្ធ​មនុស្ស​អាដ​ហុក​ បាន​ថ្លែង​ ថា ​ឯក​សណ្ឋាន​អាច​ជួយ​ឲ្យ​ប្រជា​ជន​កំណត់​អត្ត​សញ្ញាណ​និង​អនុវត្ត​តាម ​បែប​បទ​ចំណាក​ស្រុក​មាន សុវត្ថិ​ភាព។​ ប៉ុន្តែ​ ប្រជា​ជន​ខ្លះ​មិន​បាន​កត់​សម្គាល់​ច្រើន​ទេ ហើយ​អ្វី​ដែល​សំខាន់​បំផុត​នោះ​គឺ​ថា អាជ្ញា​ធរ​មូល​ដ្ឋាន​ត្រូវ​ស្រាវ​ជ្រាវ​ដើម្បី​ដឹង​ឲ្យ​បាន​ច្បាស់​ពី ក្រុម​ហ៊ុន​»។

លោក អាន ប៊ុនហាក់ បាន​មាន​ប្រសាសន៍​ថា បច្ចុប្បន្ន​មាន​ក្រុម​ហ៊ុន​ជ្រើស​រើស​ពល​ករ​មាន​អាជ្ញា​ប័ណ្ណ​ចំនួន ៣០ ប្រតិបតិ្ត​ការ​ ក្នុង​កម្ពុជា។ តាម​រយៈ​ក្រុម​ហ៊ុន​ទាំង​នេះ​កម្មករ​ចំណាក​ស្រុក​ចំនួន​៨០៨៦​នាក់​ត្រូវ បញ្ជូន​ទៅ​ថៃ និង​ពល​ករ ១៤ ៣៣៩ នាក់​បាន​បញ្ជូន​ទៅ​ម៉ាឡេស៊ី ក្នុង​អំឡុង​រយៈ​ពេល​១០​ខែ​ពី​ខែ​មករា ដល់​តុលា ឆ្នាំ​នេះ៕

No comments: