ពីរ​នាក់​ដែល​សន្តិ​សុខ​ក្រុម​ហ៊ុន ឡុង​ស្រេង​ឃុំ​បាន​ដោះ​លែង

ប៊ុត ​រស្មីគង្គា

កំពង់ចាមៈ មន្រ្តី​ស៊ើប​អង្កេត​របស់​អង្គការ​អាដហុក​ប្រចាំ​ខេត្ដ​កំពង់ចាម​ លោក​ ភឿង សុភា ថ្លែង​ថា ​​សេង​ អូន អាយុ​៤២​ឆ្នាំ​ ដែល​ត្រូវ​បាន​សន្ដិសុខ​ក្រុម​ហ៊ុន​ចំការ​កៅស៊ូ​ឡុងស្រេង ចាប់​ខ្លួន​ធ្វើ​ទារុណ​កម្ម​ នៅ​ថ្ងៃ​ទី​១៩​ ខែ​ធ្នូ​ ត្រូវ​បាន​ដោះ​លែង​ហើយ កាល​ពី​ថ្ងៃ​ទី​២១​ ធ្នូ​កន្លង​ទៅ​នេះ​។

លោក​ បាន​អះ​អាង​ថា​ លោក​មិញ ទុំ អាយុ​៣១​ឆ្នាំ ជា​ជន​រង​គ្រោះ​ម្នាក់​ទៀត​ដែល​ត្រូវ​សន្ដិសុខ​ម្នាក់​​បាញ់​ឲ្យ​រង​ របួស​ជា​ទម្ងន់ ក៏​ត្រូវ​ដោះ​លែង​ពី​ការ​ចោទ​ប្រកាន់​ពី​បទ​លួច​ជ័រ​កៅស៊ូ​ផង​ដែរ បន្ទាប់​ពី​បាន​ផ្ដិត មេដៃ ឈប់​ប្ដឹង​សន្ដិ​សុខ​ក្រុម​ហ៊ុន​ ដែល​បាន​បាញ់​លោក​ឲ្យ​រង​របួស​ ប៉ុន្ដែ បច្ចុប្បន្ន​លោក​សម្រាក​ព្យាបាល​នៅ​មន្ទីរ​ពេទ្យ​ខេត្ដ​ ក្នុង​ក្រុង​កំពង់​ចាម​។

លោក​សុភា​បញ្ជាក់​ថា​ ​លោក​ សេង អូន ត្រូវ​បាន​ដោះ​លែង​បន្ទាប់​ពី​គាត់​បាន​បង់​ប្រាក់​៣០០​ដុល្លារ ​ទៅ​ឲ្យ​ប៉ូលិស​ដើម្បី​បញ្ចប់​ក្ដី​នេះ​ ហើយ​ក៏​បាន​យល់​ព្រម​ឈប់​ប្ដឹង​សន្ដិ​សុខ​ក្រុម​ហ៊ុន​ដែល​បាន​បាញ់​​និង​ ធ្វើ​ទារុណ​កម្ម​លើ​រូប​លោក​ មិញ ទុំ។

លោក​បាន​បន្ដ​ថា បុរស​ទាំង​ពីរ​ត្រូវ​បាន​ចោទ​ប្រកាន់​ពី​បទ​លួច​ជ័រ​កៅស៊ូ​របស់​ក្រុម​ហ៊ុន​ នៅ​បរិវេណ​​ចំការ​កៅស៊ូ​កាល​ពី​ថ្ងៃ​ទី​១៩​ធ្នូ​ក្នុង​ភូមិ​ពង់​សាខា ឃុំ​អូ​រម្លូ ស្រុក​ស្ទឹង​ត្រង់​ ខេត្ដ​កំពង់​ចាម។

លោក​ សេង អូន ជា​កសិករ​ម្នាក់​រស់​នៅ​ភូមិ​ពង់​សាខា បាន​ពន្យល់​ថា លោក​និង​ឈ្មោះ​ មិញ ទុំ បាន​ជិះ​ម៉ូតូ​ជាមួយ​គ្នា​ទៅ​ចំការ​​កៅស៊ូ​របស់​ក្រុម​ហ៊ុន ក្នុង​ឃុំ​អូរម្លូ​ ដើម្បី​រើស​ជ័រ​កៅស៊ូ​គេ​ចោល មក​លក់​ តែ​ត្រូវ​សន្តិសុខ​មក​ទាន់​ចាប់​ខ្លួន​ និង​បាន​បាញ់​មិញ ទុំ​ ឲ្យ​រង​របួស​ធ្ងន់​តែ​ម្តង។

លោក សម ចាន់​ថាន មេ​ប៉ុស្ដិ៍​ឃុំ​អូរម្លូ​ បាន​ថ្លែង​ថា​ សន្ដិ​សុខ​ក្រុម​​ហ៊ុន​ដែល​បាញ់​មិញ ទុំ​ បាន បន្ដ​ការងារ​ជា​ធម្មតា​ បន្ទាប់​ពី​រត់​គេច​ខ្លួន​មួយ​រយៈ​ក្រោយ​ពេល​ជន​រង​គ្រោះ​យល់​ព្រម​ឈប់​ប្ដឹង​ ។ ប៉ូលិស​ក៏​មិន​ចាត់​វិធាន​ការ​ច្បាប់​ ចំពោះ​គាត់​ដែរ៕

Comments

Popular posts from this blog

Laotian gets life for drug trafficking

Sorn Elit, the Tallest Cambodian Taekwando Champion

Chan Tra: Life of a Cambodian Traditional Tattoo Artist